លោកអភិបាលស្រុកបន្ទាយស្រីធ្វើរឿងភ្ញាក់ផ្អើលពេញប្រទេសទៀតហើយដោយប្រកាសថាសត្វឆ្កែទូទាំងស្រុកបន្ទាយស្រី នឹងទទួលបានការការពារ គ្មានការសម្លាប់ ការជួញដូរទៀតឡើយ

ចាប់ពីថ្ងៃនេះតទៅ ទីសត្តឃាតសត្វឆ្កែ ការជួញដូរ និង ការធ្វើអាជីវកម្មសាច់ឆ្កែគ្រប់រូបភាព នឹងមិនត្រូវបានអនុញ្ញាតនៅក្នុងស្រុកបន្ទាយស្រីទៀតឡើយ ។ នេះបើតាមទំព័រហ្វេសប៊ុកផ្លូវការរបស់លោក ឃឹម ហ្វីណង់ អភិបាលស្រុកបន្ទាយស្រី ។

បន្ទាប់ពីទទួលបានគោលការណ៍ណែនាំពីសំណាក់ឯកឧត្តមអភិបាលខេត្តសៀមរាប ក៏ដូចជាអនុវត្តតាមសេចក្តីជូនដំណឹងរបស់មន្ទីរកសិកម្មខេត្តសៀមរាប ស្តីពីការហាមឃាត់ការធ្វើអាជីវកម្មទិញ លក់ ពិឃាតសត្វសុនខ កាលពីថ្ងៃទី ៦ កក្កដាឆ្នាំ ២០២០ និង ក្រោយពីបានជួបពិភាក្សាការងារជាមួយអង្គការសង្គ្រោះសត្វកម្ពុជា (Animal Rescue Cambodia) និង អង្គការ ហ្វរផរ (Four Paws) កាលពីពេលថ្មីៗនេះ រដ្ឋបាលស្រុកបន្ទាយស្រីនឹងធ្វើការហាមឃាត់ការធ្វើអាជីវកម្ម និងសកម្មភាពប្រភេទនេះ ដោយនឹងធ្វើការជូនដំណឹងជាផ្លូវការដាច់ដោយឡែកមួយទៀត ដល់រាល់អ្នកប្រកបរបរពាក់ព័ន្ធនឹងសាច់ឆ្កែទាំងអស់នៅក្នុងស្រុក។

តាមការបញ្ជាក់របស់លោកអភិបាលស្រុក កន្លងមក ការលួច ការជួញដូរ ការដឹកជញ្ជូន សម្លាប់ និង លក់សត្វឆ្កែដើម្បីយកសាច់ទៅធ្វើជាម្ហូបអាហារមានការកើនឡើងគួរឱ្យបារម្ភ ដែលក្នុងនោះស្រុកបន្ទាយស្រីត្រូវបានរកឃើញថាជាកន្លែងជួញដូរធំជាងគេនៅក្នុងខេត្តសៀមរាប ជាពិសេសនៅក្នុងឃុំព្រះដាក់ ដោយមានទីតាំងប្រមូលទិញពីបណ្តាស្រុកផ្សេងៗ ស្តុកទុកសត្វឆ្កែរស់ជាច្រើនកន្លែង និង កំពុងប្រតិបត្តិការផ្គត់ផ្តង់សត្វឆ្កែរស់និងសាច់ឆ្កែបន្តទៅកាន់តំបន់ដទៃទៀតក្នុងប្រទេសកម្ពុជា ។

ការជួញដូរនេះបានធ្វើឱ្យប៉ះពាល់ដល់វិស័យទេសចរណ៍ និង កេរ្តិ៍ឈ្មោះរបស់ស្រុកបន្ទាយស្រី និង ខេត្តសៀមរាប តួយ៉ាង មានសារពត៌មានអន្តរជាតិ ចំនួន ១៨០ បណ្តាញ បានធ្វើការចុះផ្សាយរិះគន់នៅលើគេហទំព័ររបស់ពួកគេ ក្នុងអំឡុងពីខែ វិច្ឆិកា និងខែធ្នូ២០១៩ ។ ការហាមឃាត់ការជួញដូរសាច់ឆ្កែនេះក៏នឹងលើកកម្ពស់សុខមាលភាពសត្វផង និង សុខភាពសាធារណៈរបស់ប្រជាពលរដ្ឋទូទៅផង ជៀសវាងការឆ្លងរាលដាលជម្ងឺផេ្សងៗ ។

រដ្ឋបាលស្រុកបន្ទាយស្រីសង្ឃឹមថា បងប្អូនអាជីវករដែលប្រកបរបរទិញ លក់ និងសត្តឃាតសត្វឆ្កែទាំងអស់នៅក្នុងស្រុក ជាពិសេសនៅក្នុងឃុំព្រះដាក់ នឹងមានការយោគយល់ ព្រមទាំងផ្តល់កិច្ចសហការដោយរលូន បញ្ឈប់រាល់សកម្មភាពទាំងនេះ និងងាកទៅចាប់យកមុខរបរថ្មី ដែលមិនមានការហាមឃាត់។ ការផ្សព្វផ្សាយជាមុននេះ ចាត់ទុកជាជំហរទន់ភ្លន់មួយរបស់អាជ្ញាធរមូលដ្ឋាន ដើម្បីទុកអោយអាជីវករទាំងអស់ស្ម័គ្រចិត្តរៀបចំអនុវត្តតាមការតម្រូវនៃច្បាប់ដោយខ្លួនឯង មុននឹងរដ្ឋបាលស្រុកអនុវត្តនីតិវិធីរដ្ឋបាល ៕

LEAVE A REPLY

Please enter your comment!
Please enter your name here